Premi Alberto Cesa: Son sîs i finalists che a montaran sul palc a Folkest 2025.
E je finide la fase di selezion teritoriâl dal Premi Alberto Cesa, il ricognossiment dedicât a
la musiche che valorize lis lidrîs culturâls di ogni part dal mont. Il concors, dedicât al
grant musicist piemontês, al à cjapât sù plui di 150 candidaturis di dute Italie.
A son sîs i artiscj che a àn concuistât il pass pal palc dal 6 di luj tal Folkest a San Denêl,
daspò des selezions dal vîf: a Arezzo si son imponûts i Zerofolk Duo, invezit a
Cervasche il premi al è lât al Stefano Turolla Trio. A Loano a àn vinçût i Pasticcio
Meticcio, intant che a Codroip si son distints i Urtie. A Rome al à trionfât
Massimiliano Felice cu la sô bande e a Arbizzan di Verone la vitorie e je lade ai Fan
Chaabi. Ducj i sîs vincidôrs a montaran sul palc dal Folkest 2025 a San Danêl, puartant
la lôr musiche e il lôr viaç personâl ienfri tradizion e inovazion denant dal public dal
famôs festival.
Ancje chest an come l’an passât ai grups finaliscj ur ven domandât di musicâ, cjantâ e
sistemâ un test in lenghe furlane dal poete Federico Tavan di Andreis, une figure di
grant nivel artistic, la vôs plui alte de leterature furlane inte seconde metât dal vincjesim
secul dopo Pier Pauli Pasolini, une sfide culturâl stimolante realizade in strete
colaborazion cun Morganti Editori, la cjase editrice che gjestìs i dirits di chest grant
poete.
I prins classificâts saran invidâts a esibîsi a Folkest 2026 e a Ethnos 2026. I seconds e
tierçs in clasifiche e saran invidâts a dôs seradis di Folkest sul teritori 2026. Ancje chest
an il Premi Alberto Cesa al sarà sostignût dal Nuovo Imaie.
Come che al precise il Diretôr Artistic di Folkest Andrea Del Favero “La dimension dal
live e je un aspiet impuartant de musiche dulà che si à simpri combatût cirint oportunitâts
e soluzions par lis gnovis propuestis, dispès une vore interessantis, che al sucêt di cjatâ.”
Propit in cheste linie, che la musiche e puedi e vedi vê une difusion il plui largje pussibil,
ma soredut che e puedi vê garantide la sô dimension di lavôr, in ocasion dal Festival a
ducj i musiciscj presints a San Denêl tra il 4 e il 6 di Lui al sarà ofrît, in colaborazion
cun UpBeat, la Plateforme europeane par Showcase di World Music, une grande sielte di
clinics, cun incuintris cun professioniscj dal setôr a nivel internazionâl.