A van indevant lis selezions nazionâls ai 18 di Zenâr a Udin il tierç apontament dal lunc tour che al finarà a Spilimberc ai 8 di Lui.
Dopo des primis dôs datis di Arezzo e Loano, dentri dal Festival Pifferi, Muse e Zampogne, e de rassegne Racconti d’inverno, e rivarà a Udin la caravane dal Premi Folkest – Alberto Cesa, il concors che al cîr gnûfs talents che a sunaran inte ocasion de prossime edizion di Folkest, zuiantsi la pussibilitât di vê un Premi dal Nuovo Imaie di ben cuindis mîl euros pe realizazion di une tournèe.
Ai 18 di Zenâr, vie pal conciert dal vîf a La Girada di vie Baldissera, aromai lûc storic dal cjâf lûc furlan pe musiche acustiche, trê realtâts musicâls si sfidaran a colps di notis: intal ordin Bratiska, The Breeze e Alessandro Lepore.
Bratiska
Gian Luca Bratina al nas e al vîf a Triest cul profum dal mâr e influencis di tantis fatis che a ispirin i tescj des sôs cjançons, che al tache a componi za a cuindis agns. A vincj agns si cjate di colp a sunâ intai piano bar e discotechis i sucès musicâls dal periodi e intal zîr di pôcs mês al scomence une cariere che lu puartarà a sunâ par vincjedoi agns intai locâi miôr dal Nord Italie, Austrie e Slovenie: cul passâ dai agns però lis seradis a deventin pesantis e noiosis, il public insopuartabil, la musiche, imponude e che no je la sô, e devente un pês. Dopo disevot agns dal ultin conciert come cjantautôr e jessint rivât a chê che lui al clame la maggiore età come prostituta musicale, al cjape lis distancis di dut e di ducj e al devente Bratiska, un cjantôr cu la anime punk che al fevele di aiar, vuere, vin, delusions, societât deviade, rosis, pioris e purcits.
The Breeze
The Breeze a son une idee musicâl nassude dal incuintri di cuatri amîs che a àn scomençât a sunâ insiemi par po decidi di puartâ lis lôr esperiencis passadis e influencis musicâls intune uniche formazion musicâl. Albert al ven dal folk e dal blues, Nick dal alternative rock e de cjançon d’autôr, Pablo de musiche tribâl africane e dal southern rock, Tony dal progressive e de world music. Il grup al propon un repertori che al va dal blues rurâl al rock-blues eletric, dal folk rock ae musiche etniche fint a chê psichedeliche, mantignint simpri un sunôr fuart e distint, cun moments eletrics alternâts cun atmosferis acustichis.
Alessandro Lepore
Alessandro Lepore al à scomençât la sô formazion musicâl sul piano, continuade su lis percussions, par po concentrâsi su lis veris grandis passions: la ghitare e il cjant e la creazion di tocs origjinâi. Dopo vê sunât par cualchi an in formazions locâls (proponint standard blues, rock, folk ma ancje reggae e funk) la voie di miorâ la sô tecniche e il stîl musicâl lu àn puartât intai Stâts Unîts, a Phoenix (Arizona). Dopo i agns passâts là vie al propon intes sôs cjançons chel che al vîf e che al è ator di lui: storiis di amôr e di dolôr, di entusiasims e delusions, dai up and down comuns ae esperience di tancj musiciscj dai nestris dîs.
Une serade tal segn de musiche di cualitât, tra lidrîs e cjançons d’autôr par chest biel conciert che si davuelzarà a La Girada in vie Baldissera a Udin, a scomençâ des 9.15 sore sere vinars ai 18 di Zenâr.
Par informazions: info@folkest.com / www.folkest.com