ITACA A FOLKEST PAL SOCIÂL
“La musica e je bon acet” (Capitano tutte a noi)
Musiche e dirits cuntune riflession vierte sui temis dal sociâl, di 16 agns Cooperative sociâl Itaca e Folkest a son impegnâts flanc a flanc intune otiche di sensibilizazion indreçade al bon acet des personis e al rispiet di dutis lis individualitâts. Parcè che la difese dal dirit di citadinance e je sinonim ancje di potenziament de autonomie de persone, e di valorizazion di dutis lis abilitâts. Par dâ plui fuarce al propri impegn, Itaca ancje chest an – e pal cuart an consecutîf – e sarà presinte a Folkest cul progjet Capitano tutte a noi, grup musicâl nassût intal 2013 a Pordenon e formât cumò di vot components.
Carateristiche dal progjet Capitano tutte a noi al è il so jessi simpri viert a fâ jentrâ altris components, ancje dome par condividi une esperience musicâl di scolte di chel altri, là che il grup, in plui che musicâl, al devente une famee, un grup di amîs. Un lûc e laboratori di confront dulà che i elements principâi a son la fuarce dal jessi grup e la condivision di une passion comune, la musiche, che e devente sûr, amie, e li che e je di cjase.
A son passâts aromai 17 agns di chel prin incuintri tra Itaca e Folkest, e ogni Istât si siere cul impegn di continuâ a condividi un percors e un progjet comun par promovi il lavôr di rêt e di incuintris. Par contrastâ lis derivis de democrazie, par sostignî dirits e valôrs tant che la vicinance, la fradilance, l’aiût mutuâl di là di ogni confin etnic, stigmatic, religjôs, fisic, sociâl, sessuâl, culturâl o di cualsisedi altri gjenar.
Parcè che al è dome partint di chescj principis che al è pussibil miorâ la cualitât de vite des personis, une strade che Itaca e Folkest a fasin insiemi dal 2001: Concuardie Sagjitarie (2001 e 2002), Tisane (2003), Vençon (2004), Pordenon (2005), Manià e Pordenon (2006), Pordenon e Puart (2007), San Donà di Piave e Pordenon (2008), San Donà di Piave e Pordenon (2009), Pordenon, Udin e Manià (2010), Pordenon e Spilimberc (2011), Pordenon (2012), Pordenon (2013), Davian, Tumieç e Spilimberc (2014), Talmassons, Spilimberc e Pordenon (2015), Vile di Flum e Cjassà (2016).
I Capitano tutte a noi a son:
Valentina Ius (vôs), cressude tra wave, dark e Duran Duran, e je la front woman intense e incisive;
Felice Bellucci (vôs), un timbri profont che al riclame cence fal i torments di Nick Cave o Johnny Cash, al è il cuintrialtâr di Valentina;
Pino Dipaola (vôs, percussions), la anime partenopee che e contribuìs cu lis sôs tonalitâts melodics aes tiessiduris vocâls dal grup;
Beniamino De Piccoli (ghitare), ghitarist versatil e fantasiôs, tra un delicât finger picking e virtuosisims funambolics;
Paolo Galofaro (bas), esploradôr di musichis mai scontadis, tra cjantautorât e indie rock;
Tiziano Grendene (ghitare, vôs), amant dal rock classic e dal cjantautorât talian eletric;
Domenico Ballancin (batarie, percussions), anime punk rock de band;
Paolo Paron (tastieris, armoniche), partît dal blues, al ame messedâ modernitât e sonoritâts vintage.
www.itaca.coopsoc.it
