A segnâ cheste edizion e sarà une presince ecezionâl: cuntun gnûf album di inedits publicât chest an, cul titul Lost souls (Quinlan Road, 2018), e torne in Italie la cjantautore e polistrumentiste canadese di fame mondiâl, simbul de musiche celtiche, Loreena McKennitt, cuntun tour estîf di sîs datis dilunc vie pe Italie.
Oltri a Firenze, Milan, Rome, Macerata e Bari, lunis ai 22 di Lui e sarà par Folkest tal cjistiel di Udin.
A cirche dîs agns di distance de publicazion dal so ultin album di inedits, Loreena McKennitt e je tornade tal mês di Mai di chest an cuntun gnûf lavôr e e je pronte a presentâlu ator pe Europe, cuntun totâl di 25 concierts in dîs paîs, tra chei Spagne, Gjermanie e, juste apont, Italie.
La cjantautore e à origjins irlandesis e scozesis e a son stadis chestis a vê influençât la sô musiche, che e cjape ispirazion des cjançons celtichis popolârs dulà che jê e zonte une note internazionâl, cuntun risultât incredibil e preseât in dut il mont. La artiste e à masanât cifris impuartantis: 14 milions di album vendûts cun discs di aur, di platin e multi platin.
Nomenade dôs voltis ai Grammy Awards, e à vint doi Juno e il premi ae cariere de Billboard International. Sul palc la cjantautore e sarà compagnade dai musiciscj Brian Hughes (ghitare, oud e bouzouki celtic), Caroline Lavelle (violoncel), Hugh Marsh (violin), Dudley Philips (cuintribàs) e Robert Brian (batarie).
[button color=”#6c6c6c” background=”#e4e4e4″ size=”medium” src=”https://www.folkest.com//acquista-biglietti-folkest/”] Acquista i biglietti[/button]
