Viaç curt par dôs vôs e une ghitare
Test di Alberto Prelli
Nicoletta Oscuro – vôs
Matteo Sgobino – ghitare e vôs
Un flus di peraulis e di musiche par sbrissâ tra lis pleis di une umanitât potente. Il spetacul al torne su lis vicendis di Tina, de infanzie a Udin fin ae muart in Messic, traviers des emozions e de braùre, i abandons e lis inciertecis, i slançs passionâts e lis delusions di une vite vivude cence sconts. Un viaç intim dulà che lis peraulis, il cjant e la musiche, leade ai siei lûcs e aes sôs gjeografiis, si fondin par tornâ a dissegnâ un ritrat emotîf di femine. Une Tina Modotti inedite intun continuum naratîf e musicâl delicât e corât. Un viaç dilunc de sô vite di fotografe, artiste, militante e soredut femine libare, scomençât in ponte di pîts, ae scuvierte di une personalitât inmagante, di une feminilitât lontane dai stereotips e des convenzions. Un percors artistic essenziâl, pûr, austêr: dome dôs vôs e lis cuardis di une ghitare, dome il cjant, la conte e l’incuintri intim e sclet cuntune parabule esistenziâl di umanitât cristaline e di olse straordenarie.
Un progjet nassût inte suaze de fieste de Femine dal 2016 a Madrîs di Feagne, un apontament anuâl culturâl dedicât a celebrâ e a testemoneâ l’impegn e il rûl sociâl des feminis furlanis, organizât de Associazion GENIA di Madrîs di Feagne. Un impegn che, in colaborazion tra GENIA e FolkestDischi, al è deventât cumò un progjet discografic.
