I organizadôrs di Folkest, il principâl e plui vieri festival che al esplore lis musichis e lis culturis dal mont, a visin che il brut timp ju à obleâts a anulâ il conciert dal musicist napoletan Enzo Avitabile, previodût par usgnot, miercus ai 28 di Jugn, a Montreâl.
Cui che al à comprât il biliet al sarà rimborsât cemût che al sarà scrit sul sît de manifestazion: www.folkest.com
Il program di Folkest al va indevant dì par dì tes tantis placis dai Comuns furlans che a dan bon acet al festival. Doman a Purcie cu la Kal Band de Serbie (che e repliche vinars a Redone, sabide a Flaiban, domenie a Gurize), a Poç cui “Capitano tutte a noi”, fin a Cjaudistrie cun Pietro Sabatini & Co; ancjemò, vinars a Davian cun Na Fuoia e a Prât di Cjargne cul spetacul-conciert “Tina Modotti – Gli occhi e le mani”, cun Nicoletta Oscuro e Matteo Sgobino, un viaç par dôs vôs e une ghitare.
Sabide al Prin e domenie ai 2 di Lui, invezit, a Tumieç, doi dîs di concierts organizâts cun Nuova Pro Loco Tolmezzo. Sabide i Nobraino, ancjemò la Kal Band e Doro Gjat, intant che domenie e sunarà sul palc une zovine vôs napoletane, il cjantautôr Maldestro, un vêr enfant prodige, artist talentuôs sedi tal teatri sedi te musiche.