FOLKEST 2020 IL FESTIVAL DEDICÂT AE MUSICHE FOLK AL CONFERME LA SÔ PRESINCE E IL SO LEAM CUL FRIÛL VIGNESIE JULIE INTUN TURBIN CONTINUI DI IDEIS E PROGJETS CHE A LEIN DUTE LA MUSICHE DI VUÊ FINT TAL AVIGNÎ
Plui di 50 i apontaments tra concierts dal vîf e online che a cjapin dentri la seconde edizion di Parole e musica tra libris e leturis senichis, i concors e lis premiazions cul Premi ae Cariere e il Premi Cesa pai gnûfs talents de world music.
Folkest al è plui di un festival, al è simpri un “work in progress” che al va di Zenâr a Dicembar, 365 dîs ad an che ogni Istât, di continui dal 1979, al puarte la buine musiche, chê dai artiscj vêrs e dai talents zovins, par dut il Friûl Vignesie Julie. Plui di 50 apontaments tra concierts dal vîf e online che a cjapin dentri la seconde edizion di “Parole e musica” tra libris e leturis senichis, i concors e lis premiazions cul Premi ae Cariere che al vignarà dit plui indevant e la bataie dal Premi Cesa pai gnûfs talents de world music. Ma Folkest si fâs ancje libri cu la ultime publicazion di Lungje, Pò!, si dediche al sociâl e soredut ai progjets, intun turbin continui di ideis che a lein la musiche – la musiche dute, che e va dilà dal folk par cjapâ dentri la sô componente colte e emozionâl – di vuê e dal avignî.
“Come ducj chei altris events culturâi de nestre regjon – al dîs l’Assessôr regjonâl ae Culture e al Sport Tiziana Gibelli – chest an ancje Folkest si è cjatât a frontâ une stagjon plene di incognitis par vie de pandemie mondiâl. I organizadôrs però, si son tirât sù lis maniis, rivant no dome a programâ un calendari siôr di apontaments dal vîf, ma disfrutant ancje benon il digjitâl, fint tal periodi dal lockdown. Un esempli di cemût che tornant a inventâsi e tornant a pensâ a lis propriis ativitâts, si puedin creâ events gnûfs e inmò plui atratîfs pal public”.
“Folkest al fâs 42 agns in chest 2020 par ducj cussì strani, segnât dal COVID – al conte il diretôr artistic Andrea Del Favero – e dilunc dal lockdown il festival si è fermât come ducj pensant sui pussibii disvilups futûrs, sul ûs creatîf de tecnologjie, su lis pussibilitâts dadis dai plui gnûfs mieçs di comunicazion. Ae fin si è dopleât, anzit, adiriture triplicât, leantsi inmò di plui al teritori de regjon Friûl Vignesie Julie, cun ducj chei lûcs che dilunc di cuarante agns di scorsadis musicâls a àn segnade la storie di un festival che al à vierte la strade ae world music internazionâl e a un concet moderni di promozion turistiche, che e metès insiemi l’event culturâl cuntun lûc a alte, e dispès no vonde pandude, vocazion turistiche”.
Chest an duncje Folkest al à decidût di dâ di plui e pontâ sul teritori nazionâl cuntune cincuantine di grops par plui di cincuante apontaments dal vîf tal solit apontament estîf in 27 diferents comuns dai 17 di Setembar ai 5 di Otubar – cuntune serie di anteprimis tal mês di Avost a Auronzo di Cadore, a Cjaudistrie e in provincie di Udin – ma ancje online: Folkest Suona cun concierts regjistrâts dilunc dal mês di Lui che a saran publicâts sui canâi social e che a laran in onde su Udinese TV. Une altre sezion virtuâl e à videomessaçs e piçulis intervistis di bande dai musiciscj fats vie pal lockdown par Folkest Online – Sounds over distances, un archivi di ricuarts sul festival e sui nestris teritoris viodûts di chei che tai agns a son stâts presints in regjon. Folkest al gjolt dai impuartants ricognossiments e patrocinis de UNESCO, dal Ministeri pai Afârs tal Forest de Republiche Taliane, dal Mibact – Ministeri des Arts e de Culture de Republiche Taliane, dal Ministeri de Culture de Republiche di Slovenie, de Presidence de Regjon Friûl Vignesie Julie, de Fondazion Friuli, de Arlef, dai Comuns di Spilimberc, Udin, Cjaudistrie, Auronzo.
Folkest online
Folkest online – Sounds over distances si è davuelt in plen periodi di sieradure pal Covid, cun tancj artiscj, plui o mancul cognossûts, di dut il mont, che si son spindûts a contâ lis lôr esperiencis a Folkest, dispès divertentis, cualchi volte ridiculis, forsit stranis, mai banâls. Ricuarts di moments di grande musiche che ducj lôr nus àn regalât vie pai cuarante agns di scorsadis musicâls.
Folkest Suona
Cun Folkest suona i plui interessants musiciscj acustics dal Friûl Vignesie Julie si son esibîts in chest periodi tes plui bielis ambientazions, di Polcenic a Pulfar, di Tramonç a Duin, di Pradibosc a Gurize. “O vin cirût di dâ il plui pussibil une rispueste lavorative dilatade dilunc di dut il periodi estîf ai nestris musiciscj – al spieghe il diretôr artistic Andrea Del Favero – tal limit des pussibilitâts economichis dal nestri festival, parcè che o crodìn che al sedi un segnâl impuartant di sperance, fiducie e motivazion”. I concierts a saran metûts online sui canâi social e su Udinese Tv a partî dal mês di Avost.
Une serie di cartulinis, video e sonoris, di ducj i paîs pal solit tocjâts de nestre caravane estive, su la fate di chês cartulinis agns Cuarante e Cincuante, dispès opare di fotografs significatîfs de opare (Brisighelli su ducj), cun ambientazions tipichis de epoche e cun chel vêl di kitsch che tai agns lis àn fatis deventâ ogjets di colezion, come che nus à insegnât il grant mestri Gillo Dorfles, che propit a Spilimberc al ve grancj estimadôrs e colaboradôrs.
Folkest in Cjadovri
Il Cjadovri, cu lis sôs sudivisions teritoriâls, lis tradizions culturâls, la lenghe, lis Regulis e la Magnifica Comunità, a son un teritori che si preste in maniere naturâl a un progjet culturâl e turistic come chel di Folkest; un progjet speciâl dedicât ae promozion de musiche e aes tradizions locâls, cuntune voglade al grant orizont sonôr, fat di stimui e contaminazions. O vevin la ambizion di supuartâ la aministrazion comunâl te creazion di un grant event a Misurina, ma al è dome rimandât, ancje chest al 2021. Chest an impen il prin dì di Avost a Auronozo di Cadore a parteciparan il progjet Dalle Alpi alle Pampas cui doi spetacui Il viaggio di Manuel e il Quinteto Porteno, impen ai 8 di Avost al sarà la volte di Lune Troublante e Green Waves e ai 17 di Avost la pièce teatrâl e musicâl La luce e le mani, su la figure di Tina Modotti.
Folkest a Cjaudistrie
Tancj a son stâts i grancj artiscj che si son esibîts tal cjâf lûc istrian in gracie de AIAS e a Folkest: da Joan Baez a Angelo Branduardi, Joe Cocker, Goran Bregovic, Ron, Roberto Vecchioni, PFM, Shel Shapiro e tancj altris, fasint deventâ i events di Cjaudistrie une des placis principâls di Folkest.
Doi a son i apontaments che chest an si tignaran tal spazi de Taverna in place Carpaccio ai 22 di Avost, cui istrians Le C@tene e Perpetuum Mobile, impen ai 23 di Avost I Nomadi, tra i mîts de musiche taliane, simpri in gracie de colaborazion de CAN Capodistria e dal Comun di Cjaudistrie, supuartâts dal Ministeri de Culture de Republiche di Slovenie.
Folkest a Udin
Udin e à simpri rapresentât un dai centris de ativitât di Folkest. Chest an al vignarà jù dal cjistiel par proponi tai spazis citadins un spetacul dedicât ae storie dal lavôr furlan su la Transiberiane, Irkutsk, Stazione di Irkutsk, in program ai 11 di Avost in place Venerio e une riflession suntun artist furlan di grant spessôr, un personaç poliedric che te prime metât dal Nûfcent al à segnade la vite culturâl dal Friûl cu la sô presince, Tita Marzuttini, che i vignarà dedicât il progjet Tite Grison, che al sarà presentât in place Venerio ai 31 di Avost e replicât a Cussignà ai 3 di Setembar, in colaborazion cu la Associazion Progetto Musica e il festival Nei suoni dei luoghi; un conciert su tematichis a cjaval tra il mont classic e popolâr, cun Lino Straulino e La Sedon Salvadie e il grop Kujacoustic.
Folkest e il teritori, i concierts in regjon
Dopo de anteprimis di Avost di Folkest in Cjadovri e Folkest in Istrie, il festival tes salis e in piçui spazis urbans dal Friûl Vignesie Julie si davuelzarà dai 17 di Setembar ai 5 di Otubar. La integrazion tra propueste culturâl e propueste artistiche par un turisim culturâl di profîl medi-alt a son di simpri motîf di braùre par Folkest, insiemi cul grant rapuart creât cun ducj i organizadôrs. Il festival al tacarà cuntune serade a teme cun cene e prenotazion te Antica Taverna di Palaç Attimis a Manià (che al vivarà altris apontaments impuartants di Folkest): une idee gnove par chest festival, intun puest une vore biel e preseât, dulà che si podarà prime cenâ e po partecipâ a un vêr event musicâl, metint insiemi une ecelence de musiche folk cu lis grandis ecelencis gastronomichis che la nestre tiere e sa ufrî.
In linie cu lis disposizions ministeriâls, si scugnarà prenotâ par partecipâ a ducj i spetacui di Folkest 2020. Informazions su lis prenotazions a saran dadis plui indevant.
Folkest e il sociâl
Di chest an Folkest al colabore cuntun biel progjet di turisim acessibil in alte cuote, Il volo degli angeli, metût dongje de valorizazion dal teritori a nivel turistic, plats gnûfs cun prodots tipics locâi une vore bogns e creativitât metûts insiemi ai concierts di musiche folk di Folkest. Viodûts i problemis contingjents, par chest an il progjet al sarà limitât a dome trê dîs, te sperance di podêlu slargjâ tal 2021 a une setemane interie.
Folkest a Spilimberc
Si sierarà a Spilimberc, che di Folkest e je la cjase, tes dôs preseadis sedis dal Teatri Miotto, pes fasis musicâls, e il salon di Palaç Tadea par Parole e musica.
La prime serade e sarà dedicade a Neri Marcorè cun Edoardo De Angelis intune inedite version teatrâl di un dialic musicâl e culturâl tra doi amîs di vecje date.
Un grant spazi al sarà dât al Premi Alberto Cesa, che al vante pal artist vincidôr une significative dotazion in gracie dal Nuovo Imaie, pe realizazion di une tournée. E po dute une schirie di grancj artiscj dal folk, de regjine de musiche de Sardegne, Elena Ledda (diretore artistiche dal Premi Parodi, lu ricuardìn), il sicilian Francesco Giunta (in colaborazion cul festival Frattempi – i segni del tempo), i Suonno d’ajere, biei vincidôrs dal Premi Cesa tal 2019 e la Fanfara Station, vincidôrs dal Premi Parodi 2019. Cence dismenteâ Silvio Orlandi che al dedicarà un omaç ae grande ghirondiste Michelle Fromentau, muarte pôc timp indaûr, esibintsi cuntune bielissime ghironde dal Berry che propit la artiste francese e sielzè par che e fos regalade a Spilimberc pal zimulament tra la citadine dal mosaic e la citât di George Sand, La chatre.
Premi Alberto Cesa
I finaliscj dal premi Alberto Cesa 2020 a son:
Bratiska – Italie
Calimani – Toscane
Carlo Pestelli – Piemont
Little Train Band – Italie
Mesudì – Italie
Musica Spiccia – Italie
Politikos – Grecie/Italie
Violoncelli Itineranti ft. Ana Pilat – Italie/Slovenie/Cravuazie
I seminaris di Folkest
Chest an in colaborazion cu la Associazion Gottardo Tomat di Spilimberc, si tignarà te citadine dal mosaic un seminari straordenari su la vocalitât mediteranie, tignût in maniere esclusive di Elena Ledda, la “vôs de Sardegne”, une des artistis plui grandis de world music mondiâl.
Folkest e Operaprima – Wien
Di trê stagjons in ca Operaprima – Wien e presente in Italie progjets di oparis lirichis che a smicjin a coinvolzi une comunitât interie (tal specific chê di Puçui) par meti in sene titui dal repertori talian. Al è il tentatîf di orientâsi viers il spirt de tradizion taliane che e viodeve il teatri di opare tal centri de ativitât culturâl citadine dal ‘700 – ‘800.
La Associazion Operaprima – Wien si è formade tal 2011 su la esperience di Opernwerkstatt Wien che te capitâl austriache e je stade promotore di spetacui di opare tal viert, tal centri di Viene, proponint dispès titui mancul famôs pai cartelons dai teatris de citât.
Dal 2018 Operaprima – Wien e je presinte in regjon Friûl Vignesie Julie cuntune gnove serie di produzions dal repertori liric talian. Tal 2019 al è stât presentât il Don Pasquale e daûr di chel, te edizion 2020, al vignarà L’Elisir d’amore di Gaetano Donizetti.
Di chest an ancje Folkest al colabore cun Operaprima – Wien condividint lis intenzions di coinvolziment de realtât dal teritori e de distribuzion di propuestis culturâls.
