L’international Folk Festival Furlan al tocje cumò Dartigne, Gurize, Reane, S. Denêl e Montereâl Valceline cun grups che a vegnin de Italie, Bosgne e Cravuazie.
A van indevant tes placis de regjon i concierts de cuarantesime edizion di Folkest che fin ai 5 di Lui al tire dongje sui palcs di plui di 25 comuns artiscj e musicalitâts di dut il mont par po sierâ cheste edizion a Spilimberc cun cuatri dîs di musiche, incuintris e presentazions editoriâls dai 6 ai 9 di Lui.
La “caravane Folkest” si le spiete martars ai 3 di Lui aes 21.15 a Dartigne cuntun apontament dopli di bandis talianis. Si scomence cui Humpty Duo dulà che un cuintribàs e une ghitare acustiche si cjatin e a fevelin in maniere simpri gnove e eficace creant un jazz insolit e moderni. Il lôr acoustic groove une vore particolâr (Luca dal Sacco ae ghitare e Matteo Mosolo al cuintribàs) si è za fat notâ in manifestazions impuartantis come Umbria Jazz, Udin&Jazz, Jazzit Fest: al è a pene vignût fûr il lôr gnûf disc, Synchronicities, dulà che a rivisitin lis musichis di Sting.
A sierin la serade i Mosaicantos, tercet metût sù di pôc cul spetacul Cancion Mujer, une dediche speciâl a dutis lis feminis. I tocs a vegnin de culture ispano americane, andaluse, iberiche, sefardite, taliane cun cualchi incursion di temis origjinâi.
Trê i apontaments in altris localitâts regjonâls pe serade di miercus ai 4 di Lui, che a scomencin ducj aes 21.15. Si spiete tal parc dal Palaç municipâl di Gurize la bielissime vôs de cjantante bosgnache Amira Medunjanin, la Billie Holiday de Bosgne. Nassude a Sarajevo tai agns Setante, vuê e la uniche interprete di lenghe sclave che e rive a espuartâ la musiche tradizionâl dal so paîs fûr dai siei confins. Amira e je la plui grande esponente de sevdah, la musiche popolâr de Bosgne Erzegovine, un gjenar une vore leât ae sô culture, te stesse maniere dal fado in Portugal o de morna a Capo Verde. “La svedah? Al è dificil definîle”, e spieghe Amira. “No je dome tradizion musicâl, ma un stîl di vite, il riflès de memorie, e lis cjançons di sevdah a contin la bielece de vite, il desideri, ma ancje la avilizion, il lancûr, il font de disperazion”. E sarà compagnade de ghitare di Ante Gelo, un dai produtôrs plui impuartants de sene jazz cravuate, oltri che brâf ghitaris e performer.
Simpri miercus a Çumpite di Reane il grup talian Gli Archimedi, une formazion di cjamare cu la utopie de improvisazion, che si môf midiant gjenars e stîi musicâi diferents, de classiche al folk passant pal jazz, la musiche antighe e altris gjenars inmò. Andrea Bertino al violin, Luca Panicciari al violoncel e Giorgio Boffa al cuintribàs.
Te biblioteche a S.Denêl simpri miercus aes 21.15 la performance Parole – Femmina cun Nicoletta Oscuro e Matteo Sgobino, un “Dialic ludic tra peraulis e musiche par feminis cun coraç e oms zentîi”. Une storie fate di tantis storiis, une polifonie di vôs femininis che a sunin cun gracie e ironie tra lis melodiis dal repertori popolâr e de cjançon d’autôr taliane. Une gjenealogjie fate di maris, fiis, nonis, gnecis, agnis e sûrs che in comun a àn dubis, desideris, gjondis, patiments, fragjilitâts, decisions cjapadis cun coraç, deliris sentimentâi, sieltis convintis e soredut di une fuarte brame di vivi.
Dople esibizion joibe ai 5 di Lui ae ex centrâl idroeletriche di Malnîs (Montereâl Valceline) Si tache aes 21.15 cun Stona, non di art dal progjet di Massimo Bertinieri, che al à vint di pôc il Biella Festival cul toc Belladonna realizât cu la produzion elegante e rafinade di Guido Guglielminetti, storic bassist e produtôr dai progjets musicâi di Francesco De Gregori, e colaboradôr, tra chei altris, di Battisti, Mina, Bandabertè, Ivano Fossati, Umberto Tozzi, Mia Martini.
Po dopo il grup istrian Vruja che al continue la tradizion des formazions musicâls de Istrie slovene e cravuate proponint tocs e bai di dutis lis componentis etnichis che a son te penisule, dal cjant a dôs vôs de Istrie sud orientâl aes vilotis, lis baladis in savrin de aree setentrionâl e i cjants in istrovenit.
Folkest si siere tra i 6 e i 9 di Lui a Spilimberc pe grande “Festa Folkest” cun concierts, grancj protagoniscj de sene internazionâl, presentazions editoriâls e ospits.