Capitâl storiche dal Friûl, a ufris a Folkest une da lis sôs miôr curnîs: il cjiscjel dai patriarcjes, che a conserve dentri il salon dal Parlament Furlan, forsit une das primis testemoniancis de vite democratiche europeane, decorât da un dai plui preseâts quadris dal Tiepolo. Su pe culine a si cjatin ancje la glesie di Sante Marie (VII secul) e la Cjase da Contadinançe, ricostruzion dal 1931 di un edifizi dal Quatricent ‘la che a si riunivin i rapresentants dai contadins furlans.
La plaçe di San Jacum o place da lis jerbis, al di di uei place Giacomo Matteotti, centri di marcjât ma ancje da la vite citadine dai ultims secui, a è stade pardabon restaurade, sie la pavimentazion sie la biele fontane, opare di Zuan da Udin. Di grant interes artistic a è ancje il ciclo tiepolesc udineis: dal palaç patriarcâl a la capele da Puritât.
La biele Place Libertât, cun la loze dal Lionel dal Quatricent e la loze di San Zuan dal Cincent, cu’ la tor da l’orloi di Zuan da Udin, a è considerade tra lis pluis venezianis d’Italie dopo chê di San Marc a Vignesie.
La cattedrâl di Sante Marie Annunziade, residenze dai ultims patriarcjes di Aquilê, a è stade tacade tal 1236 sore un vecjo edifizi sacri, decorât cun palis e afrescs di Zuan Batiste Tiepolo.
